இப்பொழுதெல்லாம் முன்பு போல் இல்லையம்மா..
நான் பெரியவனாகிவிட்டேன், என்றேன்..
நம்பாதவராக, அம்மா கண்ணை சுருக்கி முறைத்தார்..
..
நம்புங்கள் அம்மா.. உண்மைதான்..
இப்பொழுதெல்லாம்
ஒட்டப்பட்ட ஒரு பெட்டியைத் திறக்க
சமையலறைக்குச் சென்று கத்தியைக்கொண்டுவந்து
கத்தரித்துதான் திறக்கிறேன்..
அவ்வளவு ஏன்,
புதுச்சட்டையில் தொங்கும் நைலான் கயிற்றைக்கூட
அப்படிதான் துண்டிக்கிறேன்..
இன்னுமா நம்பவில்லை நீங்கள்..
இதற்கெல்லாம் மேலாக ஒன்று சொல்லவா, அம்மா
இருப்பதிலேயே குறைவான விலையில்தான்
இப்பொழுதெல்லாம் உடுப்புகளை வாங்குகிறேன்..
..
புன்முறுவலை தாளித்துக் கொட்டி
என்னுடைய இந்த நாளை இறக்கிவைக்கிறார், அம்மா..
சகா..
19/05/2026
